Cerpen Iban "Kebuah Aku Idup"

Malam nyak chukup sunyi.Semina munyi unggas ke inggar menuhka malam sunyi.Bulan pernama manchar pegari di malam hari nerangka dunya ti petang tegayam.Ba penyawan ruai rumah panjai sida,Joel duduk tegenung sambil mata iya enda tetilap merening ngagai pugu tanju.Angin ke betiup lembut nyau nusuk ke lubuk ati iya.Di baruh senawah panchar bulan pegari,Joel duduk betungkat dagu. Pagila hari ti kepenudi cuti sekula. Reti iya,seduai iya Seligie meseti pulai ke sekula pagila. Ngelamatu iya meh antara sida sekaban ke naka iya pengagit enti lebuh datai ba maya endur sida sebuat pulai ke sekula. Tang sarinya iya enda baka ke selama. Mua iya tak bekedut-kedut baka ke bisi utai ke ngachau sereta ngeregau runding ngasuh ati iya balat bendar tekuing. Ati iya sehari-hari nya tak seruran enda nyamai sereta semampai kesit-kesit. Bisi ga Indai iya nanya ke nama kebuah iya tak runggu enda pejaku baka selama tang iya enda nyaut seleka mukut,enda malas seleka beras. Dini enda tebunsa ati indai iya. Tak ari kemari iya ke kasak-kasak baka ukui ke labuh anak ngenang ulah Joel ke bakanya. Indai iya nyau begaru pala. Ukai ketegal pala ditepan kutu,tang nguji berunding. Tang runding tak lalu enggai datai-datai.

Dani pagi,baka selama mega,Joel duduk ba sofa ti nyau luya bekau ti udah dibai putar jam ti ngejang setiap sikin,minit enggau jam. Nyangka nya amat munyi ku lagu Jimmy Nyaing ‘Luya Ketegal Nuan’. Sofa nya nyau luya ketegal Joel. Ketegal sida sebilik ti seruran silih beganti ninggang sofa nya sebarang maya. Joel duduk lalu nengkadah ke sadau. Tunjuk jari mengkang digenggam bekepal-kepal baka orang ke benung becakap deka muka bungai kuntau. Ati iya pagi nya semampai enda nyamai sereta seruran kesit-kesit. Asai ti bisi utai ke salah dikereja. Tak rawan asai ati. Tang nadai ga bisi mimpi jai,mimpi rawan demalam. Asai ke bisi pekara ti ngeregau enda badu. Asai ti bisi penyalah. Suah iya narit seput lalu berunding panjai. Enda ga dada iya badu keketap. Angkat iya ari sofa luya nya lalu ngereduas pansut ari pintu,ninjau mua hari. Badas amat,nyau ngenjing perenching mata panas pagi nya. Tang enda baka ati iya ke benung tusah ngelaban arus emosi ti begeremai. Daun bungai ngerigang kering madahka pengeregas diri ti benung gaga nyambut kilau matahari. Engka gaga ensepi diri mandi sebun ambun tuchi beresi. Teperindang ga iya meda bungai nya tang agi ga ati iya berasai geremai enda lantang. ‘Nama utai bangat diayuka emosi tu’,pia ko telah ati iya bejaku betelai. Dalam ati sigi bisi saut ngagai tiap-tiap tanya dalam ati iya nya. Ukai nya baka ke nyaut tanya peresa Matematik. Tang meh iya agi berunding patut ke enda iya nusi pemedis enggau pemerinsa diri ngagai orang tuai iya. Nyau ke puas iya ke berunding lalu enda temu tunga kuing,ke pengujung iya mutus ati deka nyimpan sereta nyalam semua nya ari ti ditemu sida sebilik.

“Joel, Aya Juan nuan udah datai. Kangau  ke Seligie enggau Lajan,bai nurun sekula diatu. Lagi ujan hari nekul pejalai kitak”, Pia ko indai iya ke benung bejembui ke gari ngangau ari kaki tanju. Tekala nya mega runding iya ngeleda ari mimpi pulai ngagai dunya nyata. Tudah tuai lalu bejalai ke punggang setak laban deka ngangauka Seligie seduai Lajan.

Kira nyau tengan panchar mata panas, sida sebuat lalu berengkah nyikap diri sebedau neruska  pejalai diri pulai ke sekula ngena perau Aya Juan. Menua sida agi balat bendar kusi. Jauh bendar tinggal ari arus pemansang. Suah mega Aya Jilum  ke nyadi  tuai rumah sida kalat-kalat ngagai Opis Pemansang Menua di pasar Pakan nyin tang bedau ga bala perintah ibuh ke peminta tudah tuai. Nya alai sida bekenaka jalai ai enti sema deka undur ke pasar Pakan. Sebedau Aya Juan masang injin sepit lima kuda ke inggar mediska pending, Joel angkat baru ari perau nya lalu merap indai enggau apai iya ke benung bekedegir bediri ngemataka sida ke deka mupuk pulai ke sekula. Enda berasai tak pansut ai mata tuchi beresi enggi iya neritik naya nelusur kuyu nelian nerutu dagu.

‘Nyangka tak tu hari ti kepenudi aku merening sereta meda mua seduai. ’ Pia ku sada nyawa iya nyapa sebana dalam ati.

 Indai enggau apai iya tak enda mansutka jaku ngenang penyelai ulah anak tunggal seduai nya. Udah ti badu merap indai enggau apai iya, Joel lalu mupuk bejalai ngagai perau Aya Juan. Enda lama udahnya dinga tak ampuh pending laban munyi injin sepit ke sering-sering. Sida sebuat sama bela ngepaika jari ngagai bala diri sebilik ke benung degir-degir ngemataka pejalai sida. Joel enggai badu-badu merening tunga ngagai rumah panjai sida. “ Kada agi ulih aku meda mua seduai indai,apai? Kada agi bisi peluang aku bayam pemanah rampa menua kitai? ” Pia ko telai tudah tuai dalam ati. Nyau rapas ayas ari peda mata baru sida badu ngepaika jari. Ba perau agi meh Joel tegenung. Runding iya agi mengkang ngenang jaku Dr. Nika minggu nyin kemari lebuh iya ke ditemu bala pengajar luput dalam kelas lalu dianjung ngagai sepital besai di Sarikei.

“Joel Howenn anak David ?” Pia ko Dr. Nika nanya iya.

“Au. Aku meh nya lutur”. Pia ko tudah tuai nyaut tanya Dr. Nika.

  “Baka tu iya Joel, sepengudah bala kami meresa nuan,kami tetemuka nuan ngembuan penyakit riman untak tikas keempat. Kami minta ampun laban naka tu nadai ubat ulih ngeraika penyakit tu. Tambah mega penyakit nuan tu udah kelalu raya bendar. Enti penyakit nuan tu ditemu tumu agi,nyangka kami agi ulih nulung nuan ngena kemoterapi tauka meri nuan pil dikena munuh virus dalam untak nuan  tang virus-virus nyak udah balat bendar ngerekai sereta munuh sel-sel dalam untak nuan. Tu ti ngujungka untak nuan deka lumpuh. Tang nuan anang irau Joel. Nuan deka gerai tang nuan meseti kering semengat. Anang sekali-kali putus pengarap laban seagi-agi nuan bisi pengarap,everything will be okay. You just need to be strong and don’t give up. There’s many way to solve any matter. Believe me,Joel. You’ll be okay. Pechaya meh nuan deka suman. Pechaya meh nuan ke jaku aku. Nadai utai ti lebih beguna kelimpah ari pengarap ti besai lebuh kitai nempuh penguji.” Pia ko Dr. Nika seraya ke ngenggam jari iya rapit-rapit. Lebuh maya nya,semengat iya asaika lelang terebai midang nuju menua siti nyin lebuh iya ninga sereta belematika sigi-sigi  leka jaku ti pansut ari mulut Dr. Nika. Jaku Dr. Nika nya nadai reti ba iya. Iya nemu jaku Dr. Nika semina dikena Dr. Nika  ngenyamai ke ati iya ke benung balat tusah. Runding iya tekuing lalu tesat nadai temu penunga tekala nya. Utai ti dipeda mata iya nyau rapas. Tak petang utai asai peda mata lebuh iya ninga jaku Dr. Nika. Amai meh enda nganu tang jaku Dr. Nika tak sempama laja,pemisa iya udu bendar nusuk tungkul ati. Pemisa leka jaku Dr. Nika lebih pedis agi ari ke ditanchum duri besi sereta lebih tajam ari semilu. Tak lebih pait ari empedu. Ke ditemu iya orang ke ngembuan penyakit riman untak mimit aja ke ulih diselamatka lalu mayuh ke ngejang pegi ngelawa Batang Mandai,midang ke langit mingkai. Nya alai iya tak semina nganti maya diri dikangau Petara pulai. ‘Anchur meh pengarap aku. Retai meh juluk ati aku. Repa meh jalai aku.Bintang pengarap aku udah anchur. Langit pengidup aku udah petang tegayam.’ Pia ko Joel bejaku dalam ati enggau ati ti pemadu iya sinu.

“Joel, umbas nuan tegenung,udah datai kitai. Aram mupuk”. Pia ko Seligie seraya ke nempap belakang tudah tuai. Iya asaika baru dani digerau mimpi rawan. Belubah-lubah tudah tuai angkat ari perau lalu bejalai entudi Seligie seduai Lajan.

“Jaga diri empu lebuh diau di sekula. Belajar manah-manah”. Pia ko Aya Juan ti seruran mesan sida tiga lebuh ti nganjung sida pulai ke sekula. Sida tiga nya aja meh bala nembiak sekula di menua sida ke agi belajar ba  pom. Nya alai andal bendar pengarap bala sida serumah ngagai sida tiga. Tambah mega sida tiga sigi nembiak ke pandai sereta nyulut dalam bidang pelajar. Ba peresa PMR taun siti nyin kemari, sida tiga sama bulih 8A lalu nyadi nembiak ke dikarapka bala pengajar di SMK Pakan. Besai lubang idung Apai Joel. Nyau mesai serumbung kapal empa pengaga sereta bai ati ti temegah ke pemujur anak diri lebuh ke sama bisi datai maya pengerami nyuaka perais ngagai bala nembiak ke nyulut ba peresa taun siti nyin kemari.

Tiga hari udah lempus pemegi Joel ke sekula,Indai iya seruran enda nyamai ati. Pia mega apai iya tak enda masuk makai. Enti tinduk enda kala jenak ngenang ulah anak iya. Ngelamatu Joel sigi pejaku. Enda kala sunyi pengidup  seduai melaki bini sekumbang Joel ada ke dunya. Joel meh nyadika buah ati. Joel nyadika anak asi. Nama Joel seruran niti di mulut berari. Makai Joel,mandi Joel,ngirup,Joel,gawa pan Joel .Sema jaku semua utai ti dikereja sigi ngenang Joel belama. Bah! Dini alah bakanya. Tak semadi meh seduai belengka ari Joel.Enti ulih Joel sigi dimarik enggau tekang gemala,digari enggau tenun benang emas lelanjang sutera,ditinchin enggau intan permata. Tang mar meh seduai ukai juragan kaya,ukai pemesai merintah menua. Ukai agung ke mayuh reta. Ukai Menteri ke peturun raja.Dini mega ulih meri intan belian ngagai anak seduai laban seduai sigi ukai orang ke bereta munyi ko leka lagu Gilbert Gaong. Tak semina pengasih aja meh ti ulih diberi enggau sepenuh ati.

Lemai nya,indai enggau apai iya baru apin lama udah pulai ari kebun. Tak baru nudukka diri seduai iya. Dinga tak rauh-rauh nyawa Aya Jilum ngangau ari pintu ruai.

“Bisi dia seduai Apai Joel?” Pia ko kangau Aya Jilum.

Apai Joel ke benung nungkun api ruku,beguai-guai pansut ke ruai.

“Nama utai nya Jilum? Nama nuan tak baka orang ke lari ka antu? tak puchat kelat gamal nuan peda aku”. Pia ko Apai Joel.

“Joel masuk sepital. Bala pengajar iya baru empai lama udah telipun ngagai aku. Sida ngasuh seduai enda tau enda nurun ke sepital. Joel udah kelalu raya bendar di sepital din”. Pia ko Aya Jilum. Apai Joel tak tegenung temati kutu. Indai Joel tak rung-rung nyabak ninga jaku Aya Jilum.

Enda lama udahnya,sida tiga lalu undur ke pasar Pakan. Ari pasar Pakan,sida tiga ngena bas ke sepital Sarikei. Datai di sepital,seput Joel sigi udah nadai agi. Tebeleka semengat anak ti dikesayau ari tubuh. Semina tubuh ke agi garing-garing ba atas katil sepital.  Terebai midang tesat diambi Petara pulai ke Batang Mandai. Ai mata indai iya seruran labuh naya. Pegi  meh buah ati peremban dalam laya sulai. Pegi meh Joel nengali hari,parai meh Joel nengali lemai. Nya baru apai enggau indai iya nemu utai ti nyadi. Nya meh utai ke diayuka ati ti semampai enda nyamai. Mupuk meh pebayu anak asi ngejang midang enda ulih digiga ninggalka seduai ti seingau-ingau sebatang kara. Atur Petara nadai sapa nemu laban kitai mensia semina ulih merambu tang Petara ti nentuka semua.

SETAUN UDAHNYA…

Setaun Joel udah pegi,lemai nya indai iya benung nyapu uras dalam bilik sida. Enda mukai-mukai,iya lalu tepedaka surat ke diselitka orang ba baruh tajau lama sida. Belubah-lubah indai iya ngambi surat nya lalu macha isi iya :

‘Apai enggau Indai ti dikerinduka aku selalu,aku minta ampun ketegal ti belalaika utai ti nyadi ari seduai . Pengasih seduai baka ai ambun tuchi beresi. Enda nemu badu,enda nemu leju mesi ai pengerindu ngagai aku. Enda nemu langkang ai sungai penyayau seduai. Mengkang nelusur seruran lelepu.Taja ribut enggau bah kudi nabanka rarat kin kitu,pagi ila lusa mansang ngundang datai baru. Indai enggau apai ti aku puji selalu, seruran betelai leka jaku seduai. Amat memelan lagu serebana ati nuan. Nyadika timang peransang aku nyulut dalam pelajar enggau pengidup. Enda ulih aku balas enggau benda tajau menaga. Enda alah ku ganti enggau tawak bebendai. Semina penyan dalam ati meri basa sereta puji. Apai enggau indai ti dikenang selalu,enti enda betanjan ba dan pengasih ati seduai,entah meh enda aku ulih idup ba dunya injau. Semadi laban seduai ke sanggup datai nemparu meda aku ke rarat kili rarat kulu ngerambing tebing ngiga alai endur ngetu. Seduai ke sanggup datai meri pengerindu mai pengaga dalam pengidup aku.Taja sekeji mata kitai begulai ba dunya nyata,taja sekejap aja ulih mantaika pengerindu belala,anang meh tusah ati belama. Pemegi aku bisi ga mai reti dalam pengidup seduai. Awakka orang temegah ati ke seduai laban bisi anak ka baka aku.  Aku nemu pemegi aku sigi enda disagi tang penatai seduai sigi aku anti. Tu meh kebuah aku idup. Ngasaika pengasih seduai taja timpuh aku beretan ba dunya tu semina 16 taun aja.  Aku nganti di pintu serega. Indai..apai.. tu meh hari kepenudi aku meda mua seduai. Hari keterubah aku ada meda dunya, naka meh pengaga ati seduai. Tentu maya nya seduai besampi ngagai Petara awakka aku nyadi anak ke menyana enti udah besai ila. Petara udah nyaut sampi seduai. Aku udah nyadi anak ti beguna ngagai seduai. Tang indai,apai, aku minta ampun laban enda ulih malas pemanah seduai. Enti sema seput ulih dibeli,engka lama aku udah ngereja iya. Enda aku sanggup ngelengka ke seduai. Tang mar meh indai,apai seput mensia lebih berega ari semua utai di dunya. Aku udah bendar beretan. Aku udah lelak nyabak dalam ati. Aku udah puas rauh-rauh ngetat ke pemedis diri.  Lela luluh ati aku indai bai seruran nyabak kekisi. Ambi meh aku ari darung sebayan tu. Diatu,udah datai alai aku patut bebelak. Aku ka tinduk. Tinduk belama-lama iya. Tang mata aku tak enggai nyadi belelap. Sadaka aku timang leka jawang perindang atiku tetengap puang,ngambika senang alai aku pegi lelang midang nengkilah remang nengkadah bulan. Timangka aku sada leka nyawa,ngambika nyamai alai aku pulai melandai leka. Bai meh aku dalam mimpi seduai. Amat meh enda dataika siang.Terima kasih ke seduai. Aku arapka Tuhan merekat seduai belama.

Anak nuan,

(Joel Howenn )

Nyau teduduk indai Joel sepengudah ngabiska bacha isi surat anak ti dikesayau. Ai mata nyau nerutu nyerumba ujan nyala lemai. Nyau bakaberai nitik labuh ari pegung ai mata ke leledung. Dinga tak dayu-dayu sabak tudah tuai mantaika leka serebana nelah sera nyawa. “Dini nuan anak asi? Indai ngiga nuan anak sulu kunsi. Dini nuan anak asi,emperiyai ambai anak emperuji ati?Tulung karung mengandai meri rampang bungai. Samak jayau pugai asuh iya terebai nuju nuan anak di Batang Mandai. Padahka anak asi aku nganti iya tiap lemai. Padahka iya aku sunyi nadai iya ngerimbai. Nyerumba  lemai ninting sabung malam nyabak serintak aku anak dalam pesedan. Dini meh melanyi nuan anak sulu tunang?Lapa nuan nyau nadai datai mansang ngundang. Tilik aku ke bilik,nadai ga meda nuan ketawa lelekik. Merening aku ke pangking nadai ga meda nuan gali gegaring. Nengkadah aku ke sadau nadai ga meda nuan duduk dedugau. Mawa aku anak nadai ninga nuan ketawa gaga. Mamau aku anak nadai meda tuchum nuan ke ngasuh aku seingau-ingau. Oh..anak asi tinduk enda meh aku masuk,mata enggai pejam asaika empeleman abuk padi rutan. Asi aku pakai asai rau rangkang padang kerekai panas sebulan. Tang chapak ti udah pechah belah dua dini nyak ulih bejantil agi deh anak asi. Semina dalam ati aku besampi awakka nuan anak enggau Apai di serga. Bisi maya ila kitai betemu mua.” Nyau lama agi munyi isak sabak indai Joel nyau makin rapas ari didinga pending. Nyangka nyak nyau udah ulih nerima selatan nasib diri ti bangat jai.

-ABIS-