Cerpen Iban "Kebuah Aku Idup"

JEREPAN : BIAR AJA MEH
Tegenung Jessi duduk ba pala tangga. Pagila iya deka mupuk pulai ke Pakan, menua asal iya. Udah sebulan iya diau enggau entua iya dia. Puas apai enggau indai iya talipaun ngasuh iya pulai tang meh ati iya meruan ingat ke Alex belama. Bisi kala ati iya berunding deka nitihka Alex ‘pulai’ tang sayau Alex ukai enggi iya. Alex digaga Tuhan endang ungkup Cecil siku aja. Iya enggai nyadi batu penekul entara pengerindu tuchi dua ati  ti udah ninggal pegi.
“hemmm….”. panjai kesuh seput iya sepengudah ti ngabiska bacha ari bup diari ke dipegai iya ba jari. Diari ke nyerita ke pasal pengerindu siku indu. Nyangka enda iya ulih telaban ke pengerindu Cecil. Pemesai pengerindu iya ke Alex enda baka pemesai pengerindu Cecil ke Alex.Nitik ai mata tudah tuai ngenang pengerindu seduai ti enda lama dipegai lalu layu. Udahnya,belubah-lubah runding iya lalu tepulai ngagai maya dulu. Maya Alex pegi ari pengidup iya.….………………Tegir-tegir Alex merening pemayuh tugung sungkup ke bisi ba depan mata iya. Jari kanan iya ngenggam rat bungai ros putih ke bisi tiga pating. Kitai pan sama nemu,tiga pating bungai ros putih nyak nandaka pengerindu sekeda orang ngagai orang ti  dikesayau ke iya. Jari sepiak megai siti bup diari ke ditulis enggau nama ‘Cecil Geraldine Flores’. Tak berat asai ati ka nyingkang ke kaki. Tak bangat asaika bulih setan pemerat kaki ke ka diangkat ke iya. Nyau sama pemerat enggau buah sawit ke selalu dijual sida sebilik ba kilang sawit Apai Adut. “Apuu!.. Tak naka meh ngemalat ukum ke diberi Petara ngagai aku”. Pia ko telah dalam ati iya. Enda lama udahnya,begadai-gadai ga tudah tuai nyingkang ka kaki. Seminit udah ngejang bedau gak tudah tuai datai ba endur ke dituju. Ati iya udu amat gesak geregayak. Asaika dientum enggau sangkuh dada iya meda nama orang ke ditulis ba mua pendam nyak.  Digusuk iya mata tudah tuai. Ditempap iya ga dua piak kuyu. ‘Pedis amat! Apu! Ukai mimpi meh tu’ pia ko ati iya bejaku. “Tuhan.. Padah meh ngagai aku diatu,utai ke dipeda aku tu semina mimpi. Gerak aku ari mimpi rawan,mimpi nangi tu. Enda sanggup aku nerima semua tu!..” Dinga tak nyau enggau panjung-panjung nyawa iya nyeradak enggau ai mata ke labuh naya.Enda mukai-mukai ujan lalu labuh ngemasah ke iya. Isak sabak iya enda didinga agi laban munyi ujan ke nyau baka munyi batu ke ninggang atap. Iya nyerauh enggau sabak-sabak sampaika iya nyau teduduk ba mua pendam nyak. Enda bebah-bah agi iya lalu merap ‘batu nisan’ nyak.
‘R.I.P. CECIL GERALDINE FLORES….’ Enda badu-badu tudah tuai macha nama ke ditulis ba ‘batu nisan’ nyak. Iya arap amat bisi orang ngerak iya lalu madah ngagai iya semua utai ke dipeda iya nyak semina mimpi.“Kumang..Lelengau aku chukup enda betah nuan. Iga ga ngenyampat nyak nuan pegi ninggalka aku ditu kediri. Iga nuan enda kasih meda pemedis pengidup aku ke enda jerih enggau pemerinsa ditinggal ke nuan bakatu.. lemi semengat aku ambai ditinggal nuan pegi ke Batang Mandai. Asaika mimpi. Nemunya sigi nyata.Patut meh aku selalu mimpi rawan. Patut meh aku selalu jaie kenyap aku ngelamatu intan.. tak meda senaya nuan ngepai.. Mimit nadai meh aku nyangka Petara kempang berumban ngambi nuan pulai. Mimit nadai meh aku kala nyagi pengelenyau nuan emau. Tang nuan udah ga ninggalka aku. Charik atiku sulu asaika ditanchum besi. Beraie aku ambai..Enda betah ku ambai..Asaika baru kemari tua berandau duduk berimbai.. nuan ti seruran enggau aku begulai..Dini aku ulih neruska pengidup aku nadai nuan emau.. Bai meh aku terebai begulai enggau nuan..”Tak naka meh penusah ba dalam ati iya. Tang udah kelanjur sigi enda ulih batak pulai. Asaika enggai agi iya mulaika pengingat maya seduai ti begulai sampaika iya tau ngemediska ati indu ti sayau ka iya setengah mati nyak. Tak puas meh iya udah nguji deka muai ayas indu nyak ari rapas mata tang senaya nyak semampai datai ngundang iya lebuh iya sunyi.“Ampun ke aku,Cecil. Aku nemu bakani asai ati nuan digaga aku suba. Tang ukai aku sengaja emau. Mimit pan aku nadai kala berunding deka ngemediska ati nuan intan. Enti ku nemu suba enda ku ngayahka pengerindu nuan. Enda ku nempalai ka pengasih nuan sengapa alai. Enda ke ngelengka ke nuan pia aja. Enda aku muai penyayau nuan baka gari pua ti udah luya. Enda aku ngengkahka nuan sebarang baka indu ke nadai meruah. Tang mata aku bangat buta maya nyak.. Enda nemu ni bagi emas enggau kaca. Ingin aku intan deka ngambi nuan pulai baru tang jalai udah repa. Enda alah ku tebas agi. Aku nyau baka ke deka nyapai bulan ba langit tinggi. Baka ke deka ngempu beliung enda ngambuh. Sejuta pengerindu ba ati aku udah nyadi satu. Tang tambai pengerindu nuan udah anyut ditabanka bebuli. Enda alah aku selam.. Ampunka aku,Cecil…”Belubah-lubah tudah tuai ngelap ai mata  ke nyau majak labuh neritik naya nerutu dagu. Nyau baka pemayuh ai ujan ke labuh ari langit. Bungai ke mengkang digenggam rat ba tapa jari lalu diengkah ke iya manah-manah ba atas pendam Cecil.Ujan nyau majak balat tang iya nadai berunding deka pulai. Runtu ati ti balat tusah sigi tak nadai daya agi. Baru kemari iya datai ba Sarawak,tang udah dipadah ka enggau berita ke bangat jaie bakanya. Enti indai Cecil enda madah enda meh iya nemu utai ti nyadi.
Lalu,sepengudah macha bup diari Cecil ke disua ke indai Cecil baru meh iya nemu pemesai pengerindu Cecil ke iya. Mimit nadai meh iya nemu indu ke nyadi ke kaban iya ari mit nyak ngembuan pengerindu ti chukup besai ke iya lalu sampaika iya ngapuska seput kepenudi pan tetap sayauka iya. Suba Cecil meh endur iya mantaika sebana ati. Endur iya madahka penusah diri. Lebuh iya dianu indai iya laban kelalu manchal agi mit suba,Cecil meh ke mujuk iya. Lebuh iya nyabak laban enda betah indai iya maya seduai masuk asrama,Cecil meh nyadika indai iya. Cecil tetap bisi ba tisi iya. Dalam nama-nama penusah pan Cecil tetap besedia nyuaka bau iya alai Alex beteduh. Alai Alex mantaika penusah diri. Tang,mata iya tetap buta enda ulih meda semua nyak.
Lalu,lebuh seduai abis pom 6,iya nerima tawaran belajar ba menua ribai. Cecil masuk university ba Semenanjung. Maya iya mupuk,iya meda Cecil nyabak. Iya nemu seduai sigi enda kala meleka ari pangan diri tang iya enda nemu ai mata Cecil nya nandaka nyak meh kepenudi iya seduai iya ulih betemu. Iya nemu Cecil sigi bisi penyakit laban Cecil kala luput maya agi sekula suba tang meh iya mimit pan nadai kala berunding deka nemu penusah Cecil. Suah iya meda Cecil nyabak tang nadai meh ati iya kala berunding deka nulung Cecil baka Cecil ke seruran bisi ba tisi iya maya iya tusah. Naka meh penyaie iya ngagai Cecil.
Lebuh iya pulai gawai taun siti nyin kemari lalu mai bini iya pulai ke menua,Cecil tetap tuchum merening seduai.
‘Chukup pandai nuan ngelalai ke penusah diri. Chukup pedis pemerinsa ti nuan sepi ngelamatu. Naka meh penyaie aku enggau nuan Cecil. Besai amat penyalah aku. Bakani meh aku deka nebus dosa aku ngagai nuan?..Mimit enda meh aku nemu ati nuan ngelamatu telih bepedi. Mimit nadai meh aku nemu ati nuan charik. Aku nyabak,nuan mujuk. Aku tusah nuan nulung.. Tang maya nuan nyabak aku ketawa. Maya nuan beraie aku jauh. Maya nuan merinsa aku tuchum. Besai pengerindu nuan ke aku intan. Kati meh aku tau kempang ngayahka sulu.. nadai nuan kala leju mesi ai pengerindu ngagai aku tajapan nuan nemu nuan ukai ungkup aku. Saru meh aku pemadu-madu iya saru udah magi pengerindu bepegai ba dua jari… Salah aku…”
Bisi sekali maya iya madah ngagai Cecil iya bisi ati ke Katerina. Iya agi ingat maya nyak mua Cecil lalu berubah. Cecil madah Katerina nyak indu ke ‘playgirl’ lalu suah udah ngayahka lelaki ke bepangan enggau iya. Tang iya enda pechaya.“ Amat Alex. Dini ati aku kempang deka bula ke nuan. Nuan aja kaban ti aku kembuan. Aku enggai meda nuan dikeduan indu nyak”. Pia ko Cecil maya nyak. Tang ati iya alah umbuk pengingin diri ke keran deka ngembuan Katerina. Ati iya lela meda pemajik Katerina. Agi iya ingat maya nyak iya kempang mantaika jaku jai ngagai Cecil.“ Aku nemu nuan enggai meda aku senang. Padah aja meh nuan cemburu meda aku deka ke Katerina. Nuan selalu madah deka meda aku gaga tang saritu nuan udah ngerusak ke pengaga ba pengidup aku. Nuan nemu nama kebuah? Laban semina iya aja ulih ngasuh ati aku gaga. Ukai nuan lalu ukai orang bukai mega. Nemu nuan?Kaban nama baka nuan tu? Aishh.. Semina deka nganchurka pengidup kaban aja”.
Ketegal Katerina sanggup iya nelihka ati tuchi beresi enggi Cecil.“ Sampai ati nuan Alex. Aku semina madah utai ke bendar ngagai nuan. Enti nuan bangat enda pechaya tauke enggai ninga jaku aku,anang meh sampai nuan kempang ngaga aku bakatu. 18 taun tua udah bekaban,baru sekali tu aku meda nuan sanggup ngaga aku bakatu. Nama ti ngasuh nuan berubah?..”. Cecil nyabak..“Nama utai ti ngasuh aku berubah? Ceh.. Nuan nanya aku pia?.. Tanya diri nuan empu. Nuan nyak meh ke ngasuh aku berubah. Start  ari saritu,nuan ukai kaban aku agi. Aku nadai kaban baka nuan. Anang nuan berani deka datai semak aku agi”. Alex ninggalka Cecil ke benung nyabak tusah ati.Baru seminggu iya bepangan enggau Katerina tang Katerina udah ngayahka iya. Maya  nyak iya pulai belajar kelas malam,iya tepeda ke Katerina dating enggau Robson. Maya nyak baru iya sedar,Cecil enda bula. Nesal amat dalam ati iya laban kempang nelihka ati Cecil ketegal indu nadai guna nyak.
Enti jam ulih diputarka baru,ingin amat asai ati iya deka mulaika pengingat maya nyak lalu ngemetulka semua penyalah ti dikereja iya. Enda alah diitung penyalah iya enggau Cecil tang Cecil tetap ngampunka penyalah iya. Cecil.. Cecil.. Sayau nuan berumban diambi Petara pulai..
Nyabak ai mata darah meh iya nadai meh sapa ninga. Tingkil igi leka mata bai iya nyabak enda meh Cecil nemu. Cecil udah pegi. Enti iya baka beliau,nyangka udah ditenggau iya semengat Cecil enggau batu ilau. Ngambika semengat Cecil enda sesegau ngasuh ati  iya tebunsa digerau mimpi rawan. ‘ Uji padah ke aku bakani ngasuh pemedis tu ngetu?.. Kirum ke ba angin tipang pengubat rindu ngicha atiku tau rindang baka dulu.. Nuan ngasuh aku tebelenga. Nadai aku ulih idup enti bakatu.. gila senera aku emau.. nyamai aku mati nitihka nuan ba dunya siti nyin…”. Tak majak Alex mantaika timang sera nyawa iya. Tak enda badu nyapa leka sebana ke seilu-ilu. Tak enda ngetu mantaika sera nyawa ke seingau-ingau.Enda lama udahya,iya lalu angkat. ‘Pulai aku kumang. Bisi maya ila aku nitihka nuan. Amat enda tua ulih begulai ba dunya nyata,tang di serga ila aku tetap nuju nuan..Anti meh penatai aku. Enda lama da agi..aku deka betemu enggau nuan. Deka madahka nuan pengelengau aku ke nuan..”. pia ko Alex lalu angkat begadai-gadai.
Tanah dia agi balat bendar lichin laban hari ke baru badu ujan. Enda mukai-mukai kaki iya lalu tegelinchir. Iya lalu tegali. Pala iya lalu tepantup ba ‘batu nisan’ Cecil. Darah balat amat pansut ari pala iya. Tudah Alex lalu apus maya nyak mega laban ke nadai mensia ke meda utai ti nyadi nyak. Parai meh Alex nyenggai lemai,mati meh Alex nengali ari.Maya nyak,ba rumah panjai sida Indai enggau Apai Alex benung berandau enggau menantu seduai,Jessi ba ruai sida. Enda mukai-mukai,dinga tak bisi orang ngangau ari kaki tangga.“Ooo..Apai Alex!”. Pia ko orang nyak ngangau.“Nama nyak Apai Ayor? Nama nuan tak baka orang ke digagai antu deh? Bisi endar utai ke deka dpadahka nuan tu pelaba aku. Tak enda kala nuan datai ngagai aku bakatu”. Pia ko Apai Alex.“A…a…a..Alex…”.“Iya nama main Alex deh?”. Tak irau asai ati apai Alex.“Alex udah nadai. Kenduai Apai Endu nemu bangkai iya lelakak ba pendam din. Apai Endu agi ngibun bangkai iya din. Aram jampat tua kin. Arap ke nuan besabar meh Apai Alex. Udah datai maya Petara ngangau iya pulai..”. pia ko Apai Ayor ke nyau seput-seput laban ke belanda ari pendam ngagai rumah panjai sida.Jessi ke ninga berita nyak lalu tejelepi tekala nyak. Indai Alex teduduk. Seduai menantu sama nyabak.Baru kemari anak pengkuan iya nyak pulai ke menua. Tang saritu udah ninggal pegi.
Ninga munyi nyak,sida tiga enda chechamang angkat lalu mupuk nitihka Apai Ayor ke pendam.
Datai di pendam din,bala sida serumah sigi udah mayuh betugung dia. Peda darah ke pansut ari pala Alex nyau bedanau. Jessi enda bebah-bah lalu belanda merap bangkai laki iya. Bendar tudah tuai nyabak. Enda mukai-mukai,iya tepeda ke bup diari ke bisi ditulis nama Cecil.
Udah nyak baru iya nemu utai ti nyadi. ‘Salah aku laban udah ngerampas Alex ari Cecil. Alex sigi ukai digaga Tuhan ungkup aku. Cecil meh indu ke ngempu tulang rusuk enggi Alex. Enda begulai ba dunya,di serga seduai sigi sejalai.’ Pia ko telah dalam ati iya. Maya nyak rumah panjai sida penuh laban sabak bala mensia.
….…………..Jessi semina ulih nyabar diri. Iya enda badu-badu bejaku dalam ati diri.‘Biar aja meh.. mensia semina nemu ngatur tang kebendar  Tuhan ti nentuka semua iya. Biar aja meh..’ Pia ko ati iya.
Enda lama udahnya dinga  DJ ari stesen radio CATS FM tak masang lagu Andra Band ke betajuk sunyi. ‘baka ke nemu ati aku ke sunyi nadai orang ti dikesayau’. Pia ko ati iya..Suba nuan selalu di tisiku..Maya ku sunyiMaya ku kediri..Nuan merindang aku enggau lagu..Lagu tua digaga nuan ke aku..Diatu nadai agi nuan ditisiku..Nuan udah pegi ari dunya tu..Nadai agi..Nadai ku nyangka nuan nyau pegi..Ninggal ke aku ditu kediri..Labuh ai mataku ngenang nuan..Pengingat tua suba enda ulih ku buai…
Labuh ai mata Jessi ninga leka lagu nyak. Bangat tak mangka asai ati mansa ngerimbas lubang pending..