Leka Main Iban " Sada Anak Jauh Belelang"

Mantaika sada sera nyawa

Anak indai jauh belelang

Nyeradakka leka timang jawang

Anak apai enggau ai mata

Terebai siku burung meraka tasik gilik perenching

Nyingkang nengah kampung puang

Abis kaki diraut duri penguji ke ngasuh gesak ati

Nguji penyabar enggaika tau ruji

Titik ujan enda alah kira

Anang dibanding enggau ai mata ke labuh leledung nerutu naya

Kediri-diri ngidupka nyawa ngichaka bulih utai digiga

Bekenanas meh tudah anak indai ngulihka pemandai tajapan suah labuh palai

Bekeradai meh anak apai begadai-gadai ngulihka pemujur tajapan macham bansa penanggul

Nyabak serintak anak nadai didinga sada

Rerauh kekisi minta ambi

Siang enggau malam

Begulai enggau mensia ke mayuh leman

Ngasuh ati balat enda tan

Asaika telih lama semampai dirait enggau lungga

Asaika abi suba suah disumpit enggau laja

Naka cukup pemerinsa meh anak ditu kediri

Asaika minta nyawa diambi Petara nadai nemu diri

Naka meh pemedis aku nyabak dalam ati

Asaika minta lesi deka bebadi nenggali hari

Awakka midang semua penusah ke ditapi enggau ai mata

Nadai sapa deka ninga.